Santurtziko Udalak eta Eusko Jaurlaritzako Merkataritza, Kontsumo eta Turismo Sailak lankidetza-hitzarmen bat sinatu dute gaur goizean, udalerriko industria-ondarearen eta itsasadarraren balorizazio turistiko eta kulturalerako. Akordio hori Eusko Jaurlaritzak aurten abian jarri duen lehentasunezko jarduera-eremuetako aktibo turistikoak bultzatzeko eta baloratzeko planaren barruan dago.

Horrela, Eusko Jaurlaritzako Merkataritza, Kontsumo eta Turismo sailburu Javier Hurtadok eta Santurtziko alkate Aintzane Urkijok Santurtziko Arrantzaleen Kofradian sinatu dute bi erakundeen arteko lankidetza-hitzarmena, udalerriak 315.000 euroko partida jasotzea ekarriko duena. Partida horrekin, datozen bi urteetan hobekuntza-lanak egin ahal izango ditu, udalerriko industria-ondarea eta itsasadarra balioesteko.

Udalak berak garatuko ditu proiektuak, “Gure ondare industrialaren zati hau indartzeko eta sustatzeko, gure bereizgarri eta ezaugarri diren produktu turistiko-kultural gisa”, adierazi du Aintzane Urkijo Santurtziko alkateak. Jakinarazi duenez, urtean zehar, batez beste, 4.000 pertsona inguruk bisitatzen dute Agurtza arrantza-ontzia, eta orain, diru-laguntza horrekin, erreforma garrantzitsua egingo zaio. “Ahal den neurrian, izan ginen guztia zaintzen eta mantentzen jarraitu behar dugu, bai ukiezinari dagokionez, gure memoria historikoa berreskuratuz, bai materialari dagokionez, kasu honetan bezala, hobetu beharreko bi elementu horiei distira emanez: RENFEko geltokiaren ondoko tren-makina eta Agurtza”.

“Gure itsasoa gure herriaren ezinbesteko parte izan da eta da. Inork ez luke ulertuko itsasoari lotuta ez dagoen Santurtzi bat, izan ginenaren ikur gisa. Ildo horretan, hainbat proiektu garatzen ari gara azken urteotan, iragan horren zati bat berreskuratzeko eta gaur egunera eta etorkizunera eramateko asmo sendoarekin, eta hitzarmen honek aukera emango digu esaten ari naizen honen zati bat berreskuratzeko”, gaineratu du Urkijok.

Hala, hitzarmen hau sinatu ondoren gauzatuko diren bi proiektuak honako hauek izango dira:

Agurtza atunontzia birgaitzea. Euskal kostaldean geratzen den egurrezko ontzi tradizionaletako bat da, eta Bizkaian bisita daitekeen bakarra. Itsasoaren ondoan denbora luzez egon denez ikusgai, ezinbestekoa da bertan hainbat birgaitze-lan egitea, eta, horregatik, jarduketaren helburua da bertan birgaitze-lanak egitea.

Tren-makina birgaitzea, Ezkerraldeko industriaren distira-urteak gogora ekartzen dituen ondare-elementu gisa finkatuz. Aire zabalean dagoenez, birgaitze-lanak ere ezinbestekoak dira.

Gogora ekarri behar da lehentasunezko jarduera zonaldeetarako edo eskualde behartsuetako aktibo turistikoak bultzatzeko eta balorizatzeko planak (LJZ eremuak) eremu horiek suspertzea du helburu, turismo- eta kultura-proiektu eragileen bidez. Plan horrek 6,5 milioi bideratuko ditu, guztira, Euskadiko hainbat eremu eta eskualdetan jarduketak egiteko.