Gaur eguerdian Casa Torre jauregian aitortza-ekitaldia egin zaie 2021ean SanturtziLanen eskutik herrian enpresak sortu zituzten ekintzaileei. Duela bi urte bizi dugun egoera latza gorabehera, guztira, 96 lagunek jo zuten Santurtziko Udalaren Ekintzailetza zerbitzura tutoretza-saioak jasotzera euren negozio-asmoak abian jartzeko. Azkenean, 41 enpresa-proiekturen gaineko tutoretza-saioak egin ziren, 45 promotoreren eskutik.

Nabarmentzekoa da pandemiak ekarritako oztopoak oztopo, 359 erabiltzaile erregistratu direla Ekonomia Bultzatzeko Arloaren mendean dagoen SanturtziLan ekintzailetza-zerbitzuan.

SanturtziLanen, besteak beste, ekintzaileei laguntza ematen zaie, nolabait gidatuz norberak garatu nahi duen negozio-ideia gauzatzeko bidean, betiere ibilbide pertsonalizatua diseinatuz ideia gauzatu dadin. Horiek horrela, iaz zerbitzua erabili zuten kide horien lana ezagutzera eman eta aitortza egiteko ekitaldia egin da gaur Casa Torre jauregian, non Juan Andrades Ekonomia Bultzatzeko zinegotziak ez ezik, Aintzane Urkijo Santurtziko alkateak ere hartu duen parte.

“Meritu itzela erakutsi duzue abentura horiek abian jartzean, eta, besteak beste, jarri duzuen alea handia izan da gure kaleak bizirik eta dinamismoz beterik ager daitezen. Zalantzarik ez dut esatean agertu duzuen jarrera adoretsuari balioa eman behar diogula, zuen negozio-ideietan sinetsi eta euren aldeko apustua egin duzue eta. Horren guztiorren aitortza egin nahi dizuegu” adierazi du Urkijok, zeinak bertaratutakoak animatu dituen udalarekin batera lanean jarraitzeko merkataritza-sektorearen zenbait alderdi hobetze aldera. Bestalde, Andradesek eskertu die “egun bizi dugun egoera zaila kontuan hartuta, Santurtziren aldeko apustuak eskatzen duen ahalegina egin izana, hemen zeuen negozioa sortu eta gure enpresa-ehuna sendotzen laguntzeagatik. Zuen ahaleginari esker, gure kaleak bizirik daude. Orain guzti-guztiok elkar hartuta jarraitu behar dugu lanean”.